روز الزهراء اليوم

قررت ارشح نفسى .. و انا ضامنة نجاحى تمام

و تعظيم سلام للرخاء .. و فى داهية يغور النظام

انا ست عادية جدا .. بطرحة و جلابية ..

و لا تعرفش الحزام

و الجنسية ..

طبعا مصرية مفيش فصال و كلام

ناوية اترشح للرياسة .. و انجح اوام .. اوام

و ادى الاجندة حضرتها برنامج انتخابى

ما يضيعش فى الزحام

فى الافراح هتلاقينى

بازغرد و هالم الدنيا

و فى اى ميتم برده اصوت

ما كنش يومك يا وليه

و هازور المواليد

و اركب مراجيح فى العيد .

و اهتم بالصعيد

و هاكون فنانة ..

و انسانة
و اكون قدوة

و اقول لجوزى يا سى السيد

و اتحمل مهما يقول و يعيد

و فى الاعتصامات واقفة معاهم

م الصبحية لحد المغربية

حلوة الشغلانة ديه

و ها تصور و انا بضحك

و اعمل باى باى للفضائية

وهاترسم .. و هابتسم

و انا فى زيارة للمصالح الحكومية

وهاوعدهم بزيادة المرتبات

و القبض ها يكون بالدولارات

وها فبرك شعارات

مليانة انجازات

و فى الخطة الخمسية ..

هابنى مصانع و مدارس

و فى الصحة مستشفيات و اجدد عبارات

و هاكتب ع الحيطان ..

والا فلا نصيرة الرجالة و حبيبة الستات

مش هاعمل مجلس قومى

مشروعى ها يكون قومى

و هنادى خالى و عمى

و اوعدهم بالمناصب

و اشيل دفتر شيكات

هاترشح للرياسة

و هنافس نور و صباحى

و بثينة و شعبان

هم احسن منى يعنى

و لا احسن من سوزان

ما هى حكمت مصر بردة

تصاويرها ع الكتب

و بترعى المهرجان

و اترشح للرياسة .

. ما انا بافهم فى السياسة

و الشط فايق و عايق

و هانزف العرسان

و بين شطين و ميه

حياتنا ميه ميه

و ياسين بيحب بهية

و لما اصبح رئيس

الكل معايا ها يهيص

و هانبطل تهييس

و هامنع البانجو

و الشيشة و الدخان

ولا لاقى يوم حرمان

و هاوعدكم

بحكم ديمقراطى

و الضحك يبقى ليلاتى

على معظم قراراتى

ماشين بمبدا يا اخواتى

الحظ و الصدفه

و الودع واوشوش الدكر

و الحكم للجدعان

هارعى كل فنان

شاعر .. رسام .. غلبان

هايكون فى ميدان التحرير

للى عايز يثور

لكن ثورة على حق

مش ثورة فى التزوير

و الا فلا حريه

و الا فلا تغيير

د انا فلا

رئيسكم الجديد

و ليا فكر جديد