روز الزهراء اليوم

ومش عشان باحبك يا وطن

دايما أعايرك بفقرك وهمك

وناسك الضايعين

ومش عشان باحبك هاقولك يا بومة

واجيب اللي فيه فيك

وافضل أحايلك

عشان من وشك أغور

مادمت مش سامع صوت

لأي مكنة , لأي وابور

يزعق ويطحن غلة وسنابل

وألف مصنع يلف , يدور

يبقي ليه من أصله أحبك

ويوم ميلادي

أبويا استلف أجرة الدايا

ولعن سلسفيل أبو الأيام

اللي راحت , واللي كمان جاية

وامي شافت وشي

في المرايا المكسورة ورايا

فرحت شوية , وقالت بنية

جناحها يا ناس مكسور

ومهما كانت حلاوتي ولا في قلبك

يا مايا غلاوتي

برده وحشة لأني بنية

كلي مشاكل , ودايما تشاكل

عشان عريس

وتصبح واحدة من المتاعيس

بتعلف بقرة وتلات جواميس

وعشان حماتها لسلفاتها

تصبح من الجواسيس

وقالوا عليها

تموت في الفلوس

وفي العز تهيص

والهدوم الحلوة لعبتها

والألوان في شنطتها

عشان في عنين جوزها تبقي حلوة

وتكون ثابتة في عتبتها

لكنهم دايما بيجيبوا في سيرتها

يقولوا ضلعها أعوج آدم مطرود

من الجنة لأنه كان ماشي بشورتها

لما قالت له كل

دي تفاحة مافيه في حلاوتها

ودايما - دايما يجيبوا في سيرتها

عشان كده مش حابه إني أكون أنثي

جوه التاريخ مرسومة صورتها

أبيض واسود بلا ألوان

مكسورة رايتها