روز الزهراء اليوم

هذه الثورة , ثورة يناير أظهرت معادن الناس , والناس معادن منهم الصيفح , ومنهم الحديد , ومنهم الدهب , وهذا نادر في هذا الزمان حيث وصل الجرام إلي 400جنيه مصري أما موكوس ياجنيه صحيح , ويبدو والله أعلم أن الحرية أفسدت عقولنا , وجعلتنا بلا عقل , بل أقرب إلي الجنون , فانقسمنا إلي فئات فجأة , وتحول الجميع إلي صحفيين وإعلاميين , وجهابذة في التحليل السياسي , والموقف يساعد علي ذلك , والمسألة سهلة جدا صنايعي أقصد معد طيب وعلي أد حاله في كل شئ في الثقافة والمال ..نايم طول النهار بعد أن غادر الاستوديو عند كل فجر , فلم يقرأ جريدة , ولم يتعرف علي أحداث خطيرة, وكل ما فعله أدار التليفزيون لكي يلحق بضيف مشهور خرج لتوه من الاستوديو في القناة الفلانية , مصابا بنشوة الكلام والكام تليفون الخايبين اللي رنوا عليه مادحين وشاكرين , والبلد بتولع مش مهم , وماذا قدمت هذه البرامج سوي الوكسة والشعللةالاعلامية التي لا تزيد الأمرر إلا اشتعالا ,نوعيو أخري من المعدين ومعظمهم من الجنس اللطيف , تجري الغندورة من الفجر علي صناديق الانتخاب لعل وعسي تلاقي عريس من المرشحين أو حتي الناخبين , المهم الناس تشوف النزاهة والديموقراطية , وصورة ..صورة كلنا كده عايزين صورة , واللي عايز يضحك يشوف كلام الناس البسيطة علي الفضائيات , وآدي مصر ياهبلة علي رأي صحفي صاحبنا مشاغب , حاجة حلوة خالص , وكله ياباشا في السليم , واللي خلا مصر تتسرق من تلاتين سنة تتسرق كمان عشرة وإيه يعني , بلا ثورة بلا حكومة , بلا مجلس عسكري , وكام حرامي ينهبوا في خيرها , أعود إلي الإعلام , والصحف التي أصبحت تخرج يوميا , بالتأكيد ستكتب رياني يافحل, أيوه بالحاء جاية من فحل بصل , عناوين مثيرة وخلاص , تيجي تقرا الخبر تلاقيه بلا معني زي الميه , ويدور دايما حوالين حلة المحشي , وحلة المحشي هو مجلس الوزرا , وشوف بقي مجلس الوزرا عايز أد إيه رز , وطماطم , وزيت , وخضرة تحبيشة تغريك والسلام ,, فالمجلس يحتوي علي أخبار الجنزوري , واللت , والعجن ..حلو ولا وحش ظالم ولا حنين ولا قاسي ولا ناسي قلبي معاه علي رأي صوت الحب نجاة , وبالمرة اللي حوالين مجلس الوزرا , المتصمين هل هم عساكر ولا شوية صايعين اتلموا في ساعة تجلي وبرشمة وكل واحد في جيبه ميت جنيه ..آه ياولاد الإيه منين دول يا ولاد الحلال طلعتوا لنا منين مش كنتوا تحت الكباري مش باينين وماما سوزان وماما فرخنده وماما أماني للطفولة والأمومة دايما سائلين وعليهم بالملايين صارفين طب هم فين ؟, والمنظر الحقيقة مبهج كله ثورة وحرية كل واحد ماسك في إيده طوبة, وفي الإيد التانية حباية هلوسة , وتحت باطه زميلته في الكار , وطبعا كل الفضائيات بتفضحنا وتصورنا وتقول هيه دي ثورة يناير , من هنا يكتب العتاوله من غير تفكير في سمعة مصر وحضارتها, وثورتها وخيبتها , والفلول , وابونا الغول , ووجبات الحواوشي اللي فيها سم فيران , هذه هي الصورة في كل أخبارنا السودا .
أيها القارئ حاول أن تجيب عن الأسئلة الآتية :
؟إلي متي سيظل الجنزوري معزل في مكان غير مجلس الوزرا ..هل بوليس الآداب محاصر المكان
إلي متي نظل حكومة أسماء جميل شفيق وشرف وكمال
ومن قبلها عزمي والشريف ونظيف والعادلي , طول مافيه أسماء حلوة لن تعيش لنا حكومة
أنا اقتراحي في القضية إننا نشوف لنا رئيس وزرا اسمه بردعه ولا سحلية ولا فار أو عفش يمكن حالنا ينصلح وتروح العين من مصروتندب في عين كل حاسد رصاصة والنار منها بصاصة ولا أقولك ياعين روحي اشتغلي ويا دينا رقاصة .
غلبت وغلب حماري وعماله أهلوس في الكلام وده بس من ناري ويامين يرجع مصر من تاني , صاحية واخده بالها من كل حرامي وغشاش وأناني , المهم يظهر هو ويلعلع ويبان في الصورة ومش مهم حد تاني