روز الزهراء اليوم

بير الساقية

للشاعر / مصباح المهدى

تتفرع الأسئلة

وف كل سطر سؤال

وأفضل على دا الحال

بحار بلا مينا

مابقتش قد الفرح

مابقتش حمل الحزن

ودموعى ملو المزن

وسحابى غير مكتوم

أنا كل يوم مرسوم

على جبهتى مأزوم

عاشق حدود القفص

عصفورى خايف يطير

راضى يظل أسير

للاحتلال أسئلة

للاحتلال مشاوير

مشاوير وخط السير

مضبوط هناك من هنا

مربوط ف ساقية وبير

مابيتملاش مية

بيلف تور مأمور

مرغم يلف وبس

لا قلب بيه كان حس

ولا إيد عليه طقطقت

جنبه تيران طقطقت

م الحر م الغربة

والاغتراب تربة

مدفونة فيها المنى

ياصاحبى مين كان هنا

قبلك وقام بالدور

واستقبله الجمهور

وخرج معاش وانتهى

دوامة للمنتهى

ويلف تور مأمور

سلم لتور تانى

مربوط ف ساقية وبير

ما بيتملاش مية

رحلة عبث هيه

فيها ابن آدم دار

لا الدار هتفضل دار

ولامية طالعة البير