مرسلة بواسطة
الشاعرة
الأربعاء، 17 يونيو 2015
بلغني أيها الملك السعيد , ذو الرأي الرشيد , أن الجو النهارده نار النار ’ والعرق يبهطل من البشر بالليل والنهار , والنهارده كل سنة وانت طيب آخر شعبان , وبكره أول يوم من رمضان ’ وعازمه البنات علي بط ولحمه وفراخ وحمام , وصنية بطاطس , وكمان محشي كوسة وباتنجان , بص لها شهر يار , وقادت في جتته النار , وبص لها بعنين تطق شرار , وقال لها ف استنكار : انت بتتكلمي بجد ولا هزار الله يخرب بيت اللي لموني عليكي وكان يوم بلا شمس وربيع بلا أزهار...سكتت شهر زاد وقالت : والله انت حر بكره مفيش فطار وروح دور لك علي مائدة من موائد الرحمن ساعة أدان واقعد في اآخر مكان وعلي الله يعرفوك ويشوفوك ويقولوا ملك البلاد زي حالاتنا جعان ..الله يخرب بيتك أمال فلوس الشعب بتوديها فين ؟ بتهربها لسويسر وولا لليونان ..عجبي عليك يا زمان إخلص شوف هاتتديني كام يا شهر . يا اللي ها تموتني معاك م القهر وقالوها حكمة من زمان كيد الرجال غلب كيد النسوان من ايام زليخة ويوسف والغرام والسكينة وتقشير الفاكهة وقعدة البلكونة ويوسف ولا عبر المسكينة , ماعلينا , يالله هات من الجنيهات يادوبك ألفين وما تقولشي زي عوض البخيل منين ؟
عرفاك في التمثيل جامد اوي ومتين اخلص..مدفع السحور قرب يضرب وعوض الله قرب يخلص كل الجبن وكل الكراتين ......نام شهر يار علي جنبه اليمين وطلع المحفظة وعد م الجنيهات متين وقالها : همه دول اللي معايا وحياتك يا نور العين وكل اسبوع ليكي زيهم متين قسطي الالفين عليه وارحميني يا ضي عنيه.
هبت شهرزاد هبة قوية وقالت له هات الزمردة اللي ف التاج دهية دك رزية هابيعها انا ف السوق وهاتحلي قوي وتروق وهاجيب كنافة وبرقوق , أما أنت قوم شوف مصلحة شعبك الجعان بدال نومتك دهية ..وأخذت شهر زاد الزمردة فعرفها التجار وقالوا لها من أين يا امرأة سرقتيها وحصلتي عليها وأخذتيها انها زمردة شهريار . حاكمنا الحرامي السلطان الفسدان .وأمسك بها التجار وتجمع حولها المطربون والسمار...مولاي..وهنا أدرك شهر زاد السحور فقامت تحضر الزبادي والفول..مين بيدق بالطبلة....سمعت يا عم زغلول لما اصحي المسطول اخد م الجوزة نفسين بعد ما اداني المتين جه انين
المشاركات
0 التعليقات